Uislam wa CCM na Ukiristo wa CHADEMA


Kondo Tutindaga's picture

Na Kondo Tutindaga - Imechapwa 06 April 2011

Printer-friendly version
Tafakuri

NALAZIMIKA kuandika makala hii ili kutoa mchango wangu juu ya mjadala tete unaoendelezwa na viongozi wa dini na wanasiasa. Kwa kuwa imekuwa kawaida kwa watu kuzungumzia suala hili jumlajumla tu.

Nalazimika kusema wazi kuwa makala hii imechochewa na matamshi na nasaha za Shehe Mkuu, Mufti Simba kwa waislam kwa nyakati tofauti hivi karibuni.

Mambo mawili katika mengi aliyoyatamka ni lile la kuwataka waislam wasihudhurie mikutano na maandamano ya chama cha CHADEMA kwa kudai yanavunja amani. Pili, ni lile la kuwa Rais Jakaya Kikwete anaandamwa na migogoro mbalimbali kwa sababu ya dini yake.

Nachelea kusema kuwa matamshi haya ni mazito kwanza, kwa sababu yametamkwa na mtu mzito katika taifa letu, na pili, yanawagawa Watanzania pasipo shaka.

Vyama vya siasa kama Chama Cha Mapinduzi (CCM) na CHADEMA ni taasisi za kibinadamu zenye nafasi finyu isiyotosha kummiliki Mwenyezi Mungu ndani yake.

Kwa hiyo, madai ya Mufti Simba ni mazito sana; kuwaambia watu wa dini fulani wasifungamane na chama fulani kwa sababu tu chama hicho kinaonekana kutofuata mafundisho na itikadi ya dini fulani.

Mungu ni mkubwa na chama ni kitu kidogo sana, kwa hiyo sidhani kama itakuja kuwezekana kumlazimisha Mungu aenee ndani ya chama fulani. Kimsingi ni jambo lisilowezekana kuwalazimisha watu kukipenda chama fulani kama ilivyo vigumu kuwalazimisha kuchukia chama fulani.

Hata pale CHADEMA wanapoandamana na kudai wanaishitaki serikali kwa wananchi au pale serikali inapotumia nguvu kuzuia CHADEMA isiichonganishe serikali na wananchi, ni dhana za kufikirika kuliko uhalisia.

Mwenendo wa serikali kupitia viongozi wake ndicho chanzo kikuu cha chuki waliyonayo wananchi dhidi ya serikali. Kwa hili, CHADEMA isijipe umaarufu wa moja kwa moja, na wala CCM na serikali yake wasiichangie CHADEMA kupata umaarufu usio wake.

Ndani ya CCM kuna watu wa dini zote kama ilivyo ndani ya CHADEMA. Uongozi wa vyama hivyo kuonekana kwa wakati huu kuwa na viongozi wengi wa dini fulani, ni suala la muda lisiloweza kumfanya kiongozi wa dini alazimike kuwaamuru waumini wa dini yake kukikataa chama fulani.

Kwa kuwa ni suala la muda, upo uwezekano wa uongozi huo kubadilika na kuweka viongozi ambao mufti anawapenda na hapo mufti atapata taabu kuibadili kauli yake.

Mathalani, hivi sasa kiongozi mkuu wa CCM ni Muislam na mufti anaona hiyo ni bora na kudiriki hata kusema anaandamwa kwa sababu ya dini yake. Kiongozi mkuu wa CHADEMA ni Mkiristo, na mufti anawaamuru waislam wasimfuate anapoitisha maandamano. Itakuwaje pale CCM itakapopata kiongozi mkiristo na CHADEMA ikapata mwislamu?

Baadhi ya wenye hekima wamehoji ni lini uislam umekuwa rafiki wa chama tawala kwa sababu yako maandiko yaliyoibuka miaka ya karibuni yanayoonyesha kuwa dhuluma kubwa imefanywa kwa waislam tangu tupate uhuru.

Ikiwa dai hili ni kweli, iweje leo chama tawala kilindwe na waislam kwa kukitetea kisiteswe na maandamano ya “maadui wa amani na mshikamano” wa taifa letu? Najiunga na wanaohoji kwa sababu, naamini kabisa kuwa uislam na ukiristo ni zaidi ya mtu mmoja aliye kiongozi katika taasisi.

Tukijenga hoja zetu na misimamo kwa sababu ya mtu aliye madarakani katika chama fulani, tutajinyima thawabu tunayoitafuta kwa udi na uvumba katika dini zetu.

Nikirudi katika madai ya mufti kuwa Rais Kikwete anaandamwa kwa sababu ya dini yake, nitaje mshtuko wangu juu ya tamko hili. Macho yetu yameshuhudia wakristo na viongozi wao wakimuunga mkono Rais Kikwete.

Mchungaji Lusekelo (Mzee wa Upako) amelipia kipindi maalum cha kuwaonya Watanzania ili waache kumnyooshea kidole Rais Jakaya Kikwete maana adhabu ya kufanya hivyo yaweza kuwa ni “kukatwa shingo.”

Wachungaji Getrude Lwakatare na Temba wamefanya kampeni na maombezi nchi nzima kumuunga mkono Rais Kikwete. Maaskofu kadhaa kutoka Anglikana na KKKT wamegombea ubunge kupitia CCM kwa kuvutiwa na uongozi wa Kikwete kwa CCM na hata kutumia mtaji wa kukubalika kwao japo kwa bahati mbaya haikutokea.

Wako wabunge waislam wameshinda katika majimbo yenye wakiristo wengi na hata Kikwete mwenyewe kujizolea kura nyingi katika mikoa yenye wakiristo wengi akimwacha mbali mgombea mkiristo. Hii yote inadhihirisha kuwa Rais Kikwete anaungwa mkono na wakristo.

Naweza kusema pasipo shaka kuwa uislam wa aina ya matamshi ya mufti ndio unaweza kutia kasoro mapenzi waliyonayo wakristo kwa Rais Kikwete. Tamko la namna hii linawakatisha tamaa wale wasio wa dini ya Rais Kikwete.

Kwa ushauri tu, ikiwa kweli mufti anaona Rais Kikwete anaandamwa, amtazame Rais Kikwete kama rais na siyo kama mwislamu. Mabadiliko haya ya mtizamo yanaweza kuibua ukweli uliofichika kuwa, kati ya wanaomwandama wamo wakristo na waislam na wanafanya hivyo kama wajibu wao kwa Rais waliyemchagua kwa hiari yao.

Ni hatari kumlinda rais kwa silaha bandia ya udini usiokuwapo, hali inayoweza kumfanya (kama haijamfanya!) Rais kulazimika kutazama matatizo ya nchi kwa kutumia miwani ya udini na hata kujaribu kuyatatua kwa kutumia udini. Matatizo ya taifa letu ni makubwa kuliko udini wa kulazimisha au kuchonganisha vyama na wanachama wake.

Wala matatizo ya taifa letu hayawezi kutatuliwa na amani ya bandia inayohubiriwa na baadhi ya viongozi wa dini wanaojificha ndani ya kauli mbiu hiyo ili kulinda ufisadi wa fikra zinazowatesa Watanzania bila kujali dini zao.

Kwa jitihada hizi za kuisilimisha CCM au kuibatiza CHADEMA, tunalichimbia kaburi taifa letu. Ifike mahali Rais Kikwete ajitetee mwenyewe ili kukomesha tabia hii ya viongozi wa dini kama mufti, Lusekelo, Temba na mama Lwakatare wanaojituma (kama hakuwatuma) kuligawa taifa kwa kutumia itikadi za dini na siasa.

0
Your rating: None Average: 4.2 (6 votes)
Soma zaidi kuhusu: